為圖文不符感到抱歉。這篇文是為應屆DSE考生寫的。

換著以前，我可能會話：「...

為圖文不符感到抱歉。這篇文是為應屆DSE考生寫的。

換著以前，我可能會話：「呢啲嘢唔重要嘅，冇事。」然而，近來我發現，有啲嘢對我而言唔重要啫，但係對當時人嚟講，就非常重要。

所以我唔想放輕一啲你哋覺得好重要嘅嘢嚟安慰你哋。但係我想大家一齊思考下兩個問題：

1. 今日唔得，代唔代表聽日都係唔得？

2. 呢條路去唔到你想去嘅地方，是否代表冇第二條路去到你想去嘅地方？

喺呢方面，我只能夠講咁多。

冇錯，想幫人，但係只能夠幫到咁多，呢種感覺係無力嘅。我相信好多而家陪伴喺DSE考生隔離嘅好友們都有呢種感覺。

但你哋千祈唔好因為覺得「做唔到啲咩」，就選擇「不如算數」。

微小嘅力量，集合埋一齊，可以嚇死你，就好似孫悟空嘅元氣彈一樣。

呢個亦係我近來嘅體驗。

話說喺舞台劇裡面，我有幕要去救三位主角，要好有氣勢咁企上張檯大嗌。

可惜我點嗌都好細聲，其實一直擔心緊唔夠氣勢，震懾唔到個場。

點知由第一場到尾場，每當我一企上去嗌，全場觀眾見到我面容扭曲聲嘶力竭，為咗幫我，都會一齊嗌埋一份。嗰個聲量，我只能夠話，非常強大。

故此，千祈唔好因為一句「加油」「take care」好似微不足道就唔理唔講，當呢股力量集埋一齊，對方一定有回應的。

祝大家都可以好似街霸嘅阿Ken咁，lost完起返身，再搏命打下一round。

最後，我近來有幾位珍惜嘅朋友都面對人生幾重要嘅關口，我雖然幫唔到咩忙，但都希望你哋搞得掂。

---